ကျွန်ုပ်တို့ နေ့စဉ်ဘဝတွင် အချိန်နီးပါး အမြဲ အသုံးပြုနေသော ကိုယ်ခန္ဓာ၏ အရေးအကြီးဆုံး အင်္ဂါများထဲမှ တစ်ခုမှာ လက် ဖြစ်ပါသည်။ လက်ကို အနေအထား အမျိုးမျိုးဖြင့် အချိန်ကြာမြင့်စွာ ဆက်တိုက် အသုံးပြုခြင်းသည် လက်ရှိ ကြွက်သားများနှင့် အာရုံကြောများကို ဆိုးကျိုး သက်ရောက်စေပါသည်။ ထို့ကြောင့် ဒဏ်ရာ လက္ခဏာများ သို့မဟုတ် ရောဂါ အမျိုးမျိုးမှ လက်ကို ကာကွယ်ရန် လက်ကြွက်သားများကို ဆန့်ထုတ်ပေးနိုင်သော ရိုးရှင်းသည့် လက် လေ့ကျင့်ခန်း အနေအထားများကို လေ့ကျင့်သင့်ပါသည်။ ဥပမာ အောက်ပါ လေ့ကျင့်ခန်း အနေအထားများ ဖြစ်ပါသည်။ အနေအထား တစ်ခုစီကို ၁၀ စက္ကန့်ကြာ ၁၀ ကြိမ် ပြုလုပ်ခြင်းသည် ဒဏ်ရာ ရနိုင်ခြေကို လျော့ချရန် ကူညီပေးပါမည်။
လက်ကောက်ဝတ်ကို ကွေးခြင်းနှင့် လှည့်ခြင်း
လက်ကောက်ဝတ်ကို လက်မောင်းဘက်သို့ ကွေးပြီး ပြန်ဖြန့်ခြင်းကဲ့သို့ လွယ်ကူသော အနေအထားဖြင့် စတင်ပါ။ ထို့နောက် လက်ကို ဖွဖွ ဆုပ်ပြီး လက်ကောက်ဝတ်ကို နာရီလက်တံ ပြောင်းပြန်နှင့် နာရီလက်တံအတိုင်း အလှည့်ကျ လှည့်ပါ။
လက်ကောက်ဝတ် ကြွက်သားများကို ဆန့်ခြင်း
လက်မောင်းကို ကိုယ်ထည်မှ ဖြောင့်ဖြောင့် ဆန့်ထုတ်ပါ။ ထို့နောက် အခြားလက်ဖြင့် ဆန့်ထုတ်ထားသော ဘက်၏ လက်ဖဝါး နေရာကို ကိုင်ပြီး တင်းသည်ဟု ခံစားရသည်အထိ လက်ကို လက်မောင်းဘက်သို့ အောက်သို့ ဖြည်းဖြည်းချင်း ဖိချပါ။ ထို့နောက် လက်ကို အပေါ်လှန်၍ လက်မောင်း အနောက်ဘက်သို့ ပြန်တွန်းပါ။ အလှည့်ကျ ပြုလုပ်ပါ။
လက်ချောင်းများကို ဆန့်ခြင်း
လက်ကို စားပွဲပေါ်တွင် မှောက်၍ ပြားပြားချထားပြီး လက်ချောင်းများကို ဆန့်ပါ။ အခြားလက်ဖြင့် လက်ချောင်း တစ်ချောင်းကို တတ်နိုင်သမျှ မြင့်မြင့် ဖြည်းဖြည်းချင်း မ တင်ပြီး အခြား လက်ချောင်းများကို စားပွဲပေါ်တွင် ပြားပြား ထားပါ။ ထို့နောက် ကျန် လက်ချောင်းများကိုလည်း တစ်ချောင်းပြီး တစ်ချောင်း ထိုနည်းအတိုင်း ပြုလုပ်ပါ။
ရာဘာကွင်း အနေအထား
လက်ချောင်း ၅ ချောင်းလုံးကို စုပြီး ချွန်ချွန် ပြုလုပ်ပါ။ ထို့နောက် ရာဘာကွင်း အကြီး တစ်ကွင်းကို လက်ချောင်း ၅ ချောင်းလုံး၏ ထိပ်တွင် စွပ်ပါ။ ထို့နောက် လက်ချောင်းအားလုံးကို တစ်ချောင်းပြီး တစ်ချောင်း ဖြည်းဖြည်းချင်း ဖြန့်လိုက် စုလိုက် ပြုလုပ်ပါ။
လက်မဖြင့် တောက်ခြင်း
လက်ညှိုးကို လက်မ၏ အောက်ဘက်တွင် ထောက်ထားပြီး လက်မဖြင့် တောက်ပါ။ ထို့နောက် လက်ချောင်းကို အပြင်သို့ တွန်းရန် အားထည့်ပါ။ လက်ချောင်းဖြင့် တောက်သကဲ့သို့ ဖြစ်သော်လည်း မလွှတ်သေးပါနှင့်။ ထို့နောက် လက်ချောင်းကို လွှတ်၍ အပြင်သို့ တောက်ထွက်စေပါ။ ထပ်ခါ ပြုလုပ်ပြီးနောက် လက်ချောင်း ပြောင်းပါ။
ဘောလုံး ညှစ်ခြင်း
လက်ဖဝါးဖြင့် ကိုင်ရန် အရွယ်အစား ကိုက်ညီသော ဘောလုံး သို့မဟုတ် အလုံးပုံ ပစ္စည်း တစ်ခုကို ရှာပါ။ ထို့နောက် ညှစ်လိုက် လွှတ်လိုက် အလှည့်ကျ ပြုလုပ်ပါ။
လက်ကို ဖြန့်ခြင်း
အလွယ်ကူဆုံး အနေအထား ဖြစ်ပါသည်။ လက်ချောင်း ၅ ချောင်းလုံးကို ဖြန့်ပြီး တင်းသည်ဟု ခံစားရသည်အထိ တတ်နိုင်သမျှ ကျယ်ကျယ် ဖြန့်ထုတ်ပါ။ ထို့နောက် ထပ်ခါ ပြုလုပ်ပါ။